သားရှင်များအတွက် ဂျိုဂျိုလေး မှတ်စု (Penis)

မေမေတွေရဲ့ စကားကို ငှားပြီး သုံးလိုက်တာပါ။ တချို့က ဂျိုဂျိုလေး ဟုခေါ်၍ တချို့ကတော့နူနူးလေး ဟုခေါ်သည်။ CB မှာခဏခဏ လာမေးကြ၏။ ရာပေါင်းများစွာသော message များကို ဖြစ်နိုင်လျှင်အကုန်စာပြန်ချင်ပါသည်။ အချိန်တကယ်မရလို့ မပြန်ကြတာကို နားလည်ပေးကြပါ။ CHM ကို ဆေးရုံ। ဆေးခန်း ဟု မမှတ်ပါနှင့်။ သားရှင်များကို ဒီမှတ်စုလေး ရှယ်ပေးလိုက်ကြပါရန်။

 

#ပုံမှန်
—-
ဂျိုဂျိုလေး၏ ထိပ်ဖူးကို glans ဟုခေါ်၏။ ဆီးပေါက်ဝကလေးက အလယ်မှာ နေရာယူထား၏။ အရေပြားအပိုလေး( foreskin) က အပေါ်မှအုပ်မိုး၍ အရှေ့ကို ကျွံထွက်နေသည်။ မွေးကင်းစလေးတွင် ထိပ်ဖူးနှင့် အုပ်မိုးထားသော အရေပြားတို့သည် တွယ်ကပ်နေကြသည်။ ကလေးကြီးလာသည်နှင့်အမျှ တဖြည်းဖြည်း ကွာလာကြမည်။ ကလေး ၁၀၀ မှာ ၄၀ က အသက်တနှစ်ပြည့်လျှင် ကွာသွား ကြသည်။ ကလေး ၁၀၀ မှာ ၉ ၀ က လေးနှစ်ပြည့်လျှင် ကွာသွား ကြမည်။ ကလေး ၁၀၀ မှာ ၉ ၉ ယောက်က အသက် ၁၅-နှစ်ပြည့်လျှင် ကွာသွားကြမည်။ ကွာသွားမှသာ အုပ်မိုးထားသော အရေပြားကို အနောက်ကိုဆွဲနိုင်သည်။ အဲဒီလို ကွာသွားတဲ့အချိန်မှာတချို့ကလေးတွေက အနည်းငယ်နာကျင်မှုကို ၁-၂ ရက် ခံစားရပြီး ဆီးသွားရင်လည်းနာတတ်ပါတယ်။ အဲဒါကတော့ပုံမှန်ပါ။
မှတ်ချက်- မကွာသေးသော အရေပြားကို သန့်ရှင်းပေးရန် ရည်ရွယ်ချက် ဖြင့် ဘယ်တော့မှ အနောက်ကိုဆွဲဖို့ မကြိုးစားပါနှင့်။

#ဖြူ/ဝါဖတ် (smegma)
——————-
မကွာသေးတဲ့ အရေပြားအောက်မှာ အဖြူဖတ်। အဝါဖတ် လေး များကို တွေ့ရတတ်သည်။ အဲဒါကို smegma ဟုခေါ်သည်။ ဘာမှ လုပ်စရာမလိုပါ။တခါတလေ အဲဒီအဖတ်တွေကနေ အရည်ထွက်လာတာကို ပြည် နှင့် မှားတတ်ကြသည်။

#အုပ်မိုးထားသော အရေပြားထိပ်ကလေး အနည်းငယ်ရောင်ခြင်း
( foreskin minor inflammation)
———————————————-
အဖြစ်များသည်။ ခဏခဏ လာမေးကြသည်။ ဖြစ်ရခြင်း အကြောင်း တွေက သေး/ဝမ်း စိုနေသော diaper(သေးခံ) နှင့် အကြာကြီး ထိတွေ့နေခြင်း। မကွာသေးတာကို အတင်းနောက်ကို သွားသွား ဆွဲနေခြင်း। ဆပ်ပြာအရမ်းသုံးပြီး သေချာမဆေးခြင်း စသည်ဖြင့်။ ရောင်နေသော နေရာကို
– diaper ဘေဘီ ဇင့် ခရင် လေး လိမ်းပေးခြင်း।
– hydrocortisone 1% ခရင်မ်လေး လိမ်းပေးခြင်းဖြင့် ပျောက်ကင်းစေသည်။

# ဂျိုဂျိုလေး ထိပ်ဖူး (glans) ရောင်ခြင်း ( balanitis )
——————————————
ဒါလည်း အဖြစ်များသည်။ ကလေးက မသက်မသာဖြစ်။ ဆီးသွားရင်ငို။ ပိုးဝင်ပြီး ဖြစ်တာများသည်။ ရိုးရိုးဘက်တီးရီးယားပိုးလား। မှိုပိုး ( candida ) ကြောင့်လားဆိုတာလည်း ရှိသည်။ ဆရာဝန်က ခွဲနိုင်ပါသည်။ လုပ်ပေးလို့ရတာက-

ရိုးရိုးပိုး।ရိုးရိုးယောင်- ကလေးကို ကလေးခံနိုင်သော ရေနွေးလေး ထည့်ထားသည့် ဇလုံထဲတွင် ထိုင်ပေး। ဆီးသွားပေးခိုင်းပါ။
Hydrocortisone 1% ပါသော ဆေးအဆီ/ခရင် ကိုယောင်နေသော နေရာ၌လိမ်းပေးပါ။လုံလောက်ပါသည်။တချို့ ဆရာဝန်တွေကတော့ ဘက်တီးရီးယားပိုးသတ်ဆေးပါသော လိမ်းဆေးအဆီ လေးကိုပေးတတ်ပါသည်။

မှိုပိုး (candida) ကြောင့်ရောင်တာဆိုလျှင် ထိပ်ဖူးလေးယောင်တာအပြင် အနီစက်သေးသေးလေးများပါ တွေ့ရတတ်သည်။
ထိုအခါ ဆရာဝန်က ဘက်တီးရီးယားပိုးသတ်ဆေးအစား မှိုပိုးသတ်ဆေး လိမ်းဆေးကိုပေးပါလိမ့်မည်။ ကျန်တာကတော့ အတူတူပင်။

# ဂျိုဂျိုလေး၏ ထိပ်ဖူးရော। အုပ်မိုးထားသော အရေပြားပါ တော်တော်လေး ယောင်ရမ်းခြင်း
———————————————-
ပိုးသတ်ဆေးသောက်ရမည်။ ဆိုးဝါးလျှင် ဆေးရုံတက် ကုသရမည်။ ဆရာဝန်နှင့်ပြပါ။

# အုပ်မိုးထားသောအရေပြား၌ အမာရွတ်ဖြစ်၍ နောက်ကို လုံးဝဆွဲမရတော့ခြင်း ( Phimosis)
———————————————-
အရေပြားနဲ့အောက်က ထိပ်ဖူး မကွာသေးတာကို ခဏခဏ နောက်ကို သွား ဆွဲနေလျှင် ကြာလာလျှင် အဲဒီအရေပြားမှာ အမာရွတ် ဖြစ်လာပြီး လုံးဝနောက်ပြန် ဆွဲလို့မရတော့ခြင်းကို phimosis ဟုခေါ်သည်။ တချို့ကြတော့လည်း မွေးရာပါ ဖြစ်သည်။ ထိပ်ဖူးကိုလည်းမမြင်ရ။ သူ့အလယ်မှာရှိတဲ့ ဆီးသွားပေါက်ကိုလည်း မမြင်ရတော့။ ကလေးကဆီးသွားလျှင် ဆီးကောင်းကောင်း အပြင်ကိုမရောက်ပဲ အရေပြားအောက်တွင်အောင်းပြီး ပူဖောင်းပုံဖြစ်နေခြင်း စတာတွေကိုတွေ့ရပါတော့သည်။ မှတ်ချက်- အရေပြားနောက်ကို ဆွဲ၍မရသေးသော ကလေးငယ်တိုင်း ဆီးသွားချိန် အနည်းငယ်ဖောင်းသည်။အဲဒါက phimosis မဟုတ်ပါ။ မတရားဖောင်းကားနေမှသာ phimosis ကိုစဉ်းစားပါ။ ကုသနည်းကတော့-

-အနည်းငယ်ပြင်းသော စတီးရွိုက်လိမ်းဆေးကို တင်းနေသော အရေပြားပေါ် တလခန့်လိမ်းရန် ဆရာဝန်က ညွန်ကြားနိုင်ပါသည်။(betamethasone 0.05% cream BD for 2-4 weeks)

(သို့မဟုတ်)

-အုပ်မိုးထားသော အရေပြားကို ဖြတ်တောက်ခြင်း( circumcision) ကို လုပ်ရနိုင်ပါသည်။ မွတ်စလင်। ဂျူး နှင့် အချို့ ခရစ်ယာန်များက ကတော့ ဘာသာရေးအရ သူတို့ကလေးငယ်များကို circumcision လုပ်ပေးကြသည်။

 

# အရေးပေါ် ပြဿနာ ( paraphimosis )
———————————–
အထက်ပါ Phimosis ရှိသော ကလေးက အရေပြားကိုအတင်း အနောက်ကိုဆွဲသောအခါ ဘာဖြစ်နိုင်သလဲဆိုတာ စဉ်းစားကြည့်ပါ။ အရေပြားက ထိပ်ဖူးရဲ့ အနောက်ကို ရောက်သွားပြီးတော့ ဂျိုဂျိုလေးကို ညှစ်ပေတော့မည်။ ပြင်းထန်သော နာကျင်မှုကို ခံစားရပြီး မူလအတိုင်းအောက်ကိုလည်း ပြန်ဆွဲချ၍ မရတော့။ ဆေးရုံကို အမြန်ပြေးပါ။ အရေးပေါ်ဖြစ်သည်။ ဂျိုဂျိုလေး ဒုက္ခရောက်သွား နိုင်သည်။ ဆေးရုံကအရမ်းဝေးလျှင် နီးစပ်ရာဆေးခန်းကိုသာ ဝင်လိုက်ပါ။

# ဆီးသွားပေါက် အောက်ရောက်နေခြင်း( hypospadias )
———————————
ဂျိုဂျိုလေးရဲ့ ဆီးသွားပေါက်က ထိပ်ဖူးလေးရဲ့ အလယ်တည့်တည့် မှာမရှိပဲ အောက်ရောက်နေခြင်းကို hypospadias ဟုခေါ်သည်။ ကလေးခွဲစိတ်ကု ဆရာဝန်နှင့်ပြပါ။ hypospadias ရှိသောကလေးကို circumcision မလိုအပ်ပဲ မလုပ်ရပါ။ အဲဒီအရေပြားကို
hypospadias ခွဲစိတ်တဲ့အခါ အသုံးချရမှာ မို့လို့ပါ။

ဂျိုဂျိုလေးနှင့်ပတ်သက်ပြီး စိတ်အေးကြပါစေ။
မေတ္တာဖြင့်

စိုးမိုးကျော်( Child Health Myanmar Page )

Photos : Google

69 Shares

Add a Comment

Your email address will not be published. Required fields are marked *