ကင်ဆာနှင့်ပတ်သက်သောတွေ့ကရာဆေးမြီးတိုများကိုမshare ကြပါနဲ့အရမ်းအန္တရာယ်များလို့ပါ

53 Shares

တွေ့ကရာတွေရှယ်ပြီးလူသတ်တာတွေရပ်ကြပါ

ကျမတို့ ကင်ဆာဆောင်သည် ခုတလောဆီးနှင့်ကျောက်ကပ် ဆေးကုသဆောင်၊ ခွဲစိတ်ဆောင်များနှင့် ‎ချစ်ကြည်ရေးပွဲများ ‎ ကစားနေရသည်မှာ ‎အကြိမ်စိပ်လာသည်။လူနာ၏ ကျောက်ကပ် အဆိပ်ဓါတ်Creatinine level တွေ တက်တက်လာသဖြင့်‎ ကျောက်ကပ်ထိသောဆေးများ

ဥပမာ။ ။ Cisplatin ကို‎ ရှောင်ကွင်းသွင်းနေရသည်။တကယ်ကတော့Cisplatin သည် ဈေးသက်သာပြီး‎ ထိရောက်သောဆေးထဲတွင်ပါသည်။ လွန်ခဲ့သော နှစ်နှစ်ခန့်ကကျမရဲ့လူနာတဦး ‎ ကျောက်ကပ်အဆိပ်ဓာတ်များ‎တက်တက်လာသဖြင့်‎ ကျောက်ကပ်သမားတော်နှင့်ပြသည်။
တတ်နိုင်သောသူများ ဖြစ်သဖြင့် အိန္ဒိယသွားပြန်ပြတော့ Chemo induced acute renal failure( ကင်ဆာဆေးကြောင့်‎ကျောက်ကပ်ပျက်ဆီးခြင်း ) ဟု ‎ရောဂါနာမည်တပ်ပြီး‎ ကျောက်ကပ် ၄ ကြိမ်ခန့်ဆေးကာ‎ ပြန်လွှတ်လိုက်သည်။

သိန်းပေါင်းများစွာ ကုန်ခဲ့သည်။ ပြန်လာတော့ သူတို့ မှတ်တမ်းတွေ ကြည့်ပြီး ‎ကျမ အတော် စိတ်မကောင်းဖြစ်ရသည်။ ကျမသည် အမြဲတမ်း ကျောက်ကပ်အဆိပ်ဓါတ်ကို စစ်ပြီး ဆေးပမာဏကို ထိုဓါတ်နှင့်ချိန်ဆတွက်ချက်ပြီးမှ‎ပေးတတ်သူဖြစ်သည်။

ခုတော့ ကျမက တရားခံဖြစ်ရရှာပြီ။ ကျမ AS လေးရဲ့ စုံစမ်းဖော်ထုတ်မှုဖြင့်တရားခံကိုတွေ့ပါသည်။ သို့ရာတွင် အိန္ဒိယဆရာဝန်များကျမကြောင့်ဖြစ်သည်ဟူသော အမြင် ထင်ခံရပြီးကိစ္စကိုမူ မဖြေဖျောက်နိုင်တော့ပေ။

ထိုကိစ္စပြီးကတည်းကကျမတို့ ၂ ယောက်သည် ‎သံသယနှင့် လူနာတွေကို ကြည့်တတ်လာသည်။‎ မေးတတ်လာသည်။ ဒီနေ့လည်း အနီးအနားမြို့မှ လူနာတဦးမကွေးမှ သမားတော်နှင့်ပြပြီး ‎အစာအိမ်ကင်ဆာယူဆရသဖြင့် ‎ရန်ကုန်လွှတ်သည်။

ရန်ကုန်တွင် အပြင်ဆေးရုံများတွင် အတော်အသင့်ရွာလည်ပြီး ကုန်ကျပြီး ရန်ကုန်ဆေးရုံကြီး ခွဲစိတ်ဆောင်မှာခွဲကာရန်ကုန်ကင်ဆာဌာန အပြတွင် ‎ထိုဌာနမှ အမများက ‎မကွေးမှာ ကင်ဆာအထူးကုရှိသည်ဆိုမှ‎ ရှိပါက အဲ့မှာပဲ ကုချင်သည်ဆိုကာ‎ ပြန်လွှဲပြီး ကျမထံရောက်လာသည်။

ကျမဆီရောက်လို့ စစ်ဆေးလိုက်တော့ သွေးနီအားကျနေသည်။ ကျောက်ကပ်အဆိပ်ဓာတ်မှာ‎ ပုံမှန်ထက် ၁၃ဆခန့် များနေသည်။ဓါတ်ခွဲခန်းက စက်များမှားသလားဆိုပြီး နောက် စက်တလုံးနဲ့‎ ပြန်ထပ်စစ်ကြည့်တော့လည်း ထိုအတိုင်းပင်။ ကျမကလည်း အရင် ရန်ကုန်က စစ်ချက်များတခုချင်းပြန်ရှာတော့ အစကတည်းက နည်းနည်းတော့များနေသည်။ ဒါပေမဲ့ upper limit ကျော်ရုံသာ။ဒီလောက်ထိမများသေး။

ဒါနဲ့ပဲ ” ဆေးရုံလာတက်ရမယ်။ စစ်ဆေးစရာ ထပ်စစ်ပြီး‎ ကျောက်ကပ်သမားတော်ပြရမယ်။‎ ကျောက်ကပ်ပျက်သွားနိုင်တယ် ‎ကင်ဆာဆေးသွင်းတာ ခဏထားဦး ”‎ စသဖြင့် ဆေးရုံတက်ရန်မနည်း မဲဆွယ်ရသည်။

ဆေးရုံရောက်တော့ ကျမ AS လေးတွေကသေချာမေးတော့မှ‎ ရန်ကုန်က ပြန်လာပြီး ကျမဆီလာမပြပဲ၂လခန့် သမြားနီ တနေ့ အလုံး ၃၀ ‎သဘောင်္ရွက်ထောင်း‎ ပန်းသီးနှင့် မုန်လာဥနီကို အစိမ်းလိုက် ‎ကျိတ်ဖျော်ပြီး နေ့စဉ်သောက်ပါသည်တဲ့။

ဒါနဲ့ ကျမတို့က မင်းဂွတ်သီးအခွံကျိတ်သောက်တာ‎ ကျန်သေးတယ်‎ ကမ်းဇော်ဆီလေးပါ ထည့်လိုက်ဦး ‎ဒူးရင်းသြဇာရွက်ကလေး အုံပါလားမစုံပဲ‎ ဖြစ်နေဦးမယ်ဟု ငေါ့ပြောရပါသည်။ ဒါကြောင့် ဖေ့ဘွတ်ပေါ် စိတ်ထင်ရာရေးကြသောဆေးမြီးတို ရေးသူများကိုရော ‎ထိုပို့စ်များကို ရှဲသူများကိုပါ ‎ကျမကတော့ ပြောချင်ပါသည်။

Share တချက် Click တချက်နဲ့ လူမသတ်ကြပါနဲ့ ကင်ဆာလူနာဆိုတာ ကင်ဆာလို့ အပြောခံရတာနဲ့ သက်ဆိုင်ရာ ဆရာဝန်ပြောသမျှကလွဲပြီး မည်းမည်းမြင်ရာ ဆေးမြီးတို ပိုလန် အစက်ချဆေး ကမ်းဇော်ဆီ စပါးကြီးသည်းခြေ သဘောင်္ရွက်ထောင်းသောက် စသည်များကို ‎မဆင်မခြင် လုပ်ကြတော့သည်။

ခုလို ကျောက်ကပ် အသည်း ပျက်စီးပါကကင်ဆာဆေးလည်း သွင်းမရ ‎ဆိုင်းထားရွှေ့ထားရ ။‎အဆင်မသင့်ပါက‎ ကျောက်ကပ်ဆေးရသည်အထိ ဖြစ်ရပါသည်။ ကင်ဆာဆေး ဆိုင်းငံ့ထားလို့‎ ရောဂါက ပိုတိုးလာ ၊‎ကျောက်ကပ်ဆေးရလို့ ‎လူနာရော နိုင်ငံတော်ရော ‎ကုန်ကျစရိတ်ပိုရသည်မှာ‎ ရင်နာစရာ ကောင်းလှသည်။ ကင်ဆာလူနာနှင့် လူနာရှင်များကိုလည်း စိတ်ထင်ရာ မစမ်းကြဖို့မှာချင်ပါသည်။ သစ်ဥ သစ်ဖု သစ်ရွက်ဆိုဘေးမဖြစ်ဟု မထင်ကြပါနဲ့ ဖေ့ဘွတ် သုံးသူများ ကင်ဆာလူနာများကို ညှာတာပြီး ဆေးမြီးတို Share ရန် လက်တွန့်ကြပါရှင်

Dr.ဒေါ်သော်တာပပထွန်း

53 Shares

Add a Comment

Your email address will not be published. Required fields are marked *