ဥပဒေအထက်မှာ ဘုရင်ကိုပင် မထားတတ်တဲ့ မင်းတုန်းမင်း ရဲ့ ငယ်ဆရာ ပခန်းမင်းကြီး ဦးရန်ဝေး အကြောင်း

ဥပဒေအထက်မှာ ဘုရင်ကိုပင် မထားတတ်တဲ့ မင်းတုန်းမင်း ရဲ့ ငယ်ဆရာ ပခန်းမင်းကြီး ဦးရန်ဝေး အကြောင်း

<><><><><><><><><><><><>

မင်းတုန်းမင်းလက်ထက် လွှတ်တော်မှာဝန်ကြီး ရှစ်ပါးရှိပါတယ်။ ဒီအထဲက အဓိကဝန်ကြီးကတော့ သတိုးမင်းကြီး မဟာမင်းလှစည်သူ ဦးရန်ဝေး ပါပဲ။ ဦးရန်ဝေးဟာ မင်းတုန်းမင်း လွှတ်တက်မင်းသား ဘဝတည်းက ဆရာတော် ဦးဝိသုဒ္ဓ အဖြစ်သီလမှန်မှန်ပေးခဲ့သူ ဖြစ် တာကြောင့် မင်းတုန်းမင်းရဲ့ ငယ်ဆရာလို့လည်း ပြောလို့ရပါတယ်။

 

( ဦးရန်ဝေးဟာ ကင်းဝန်မင်းကြီးဦးကောင်းရဲ့ ဆရာလည်းဖြစ်ပါတယ်) ။ မင်းတုန်းမင်း ရွှေဘိုကိုတိမ်းရှောင်စဉ်မှာ အတန်တန်တောင်းပန်တာကြောင့် ဦးဝိသုဒ္ဓဟာ လူဝတ်လဲပြီး အကြီးတော်အဖြစ်လိုက်ပါခဲ့ပါတယ်။ မင်းတုန်းမင်း ဘုရင်ဖြစ်တော့ အတွင်းဝန်၊ သေနတ်စုဝန်၊ လွှတ်တော်ခေါင်းဆောင်ဝန်ကြီး ၊ နိုင်ငံခြားရေးဝန်ကြီး စသည်ဖြင့် ထိပ်ဆုံးရာထူးကြီးများကို ယူခဲ့သူဖြစ်ပါတယ်။ မင်းတုန်းမင်း ကလည်း ဆရာကို အလွန်သိတတ်သူဖြစ်ပါတယ်။ သူ့ဆရာလူထွက်ဝန်ကြီးကို သာယာဝတီမင်းရဲ့မိဖုရားငယ် သန်လျှင်မြို့စားမိဖုရားနဲ့ လက်ဆက်ေ စပြီး လစာရိက္ခာ ၂၀၀၀ ကျပ် ချီးမြှင့်ကာ ပခန်းဝန်ကြီးအိမ်ကို ပွဲတော်အုပ်ပို့ပေးတဲ့အထိ ပါပဲ။

တစ်ကြိမ်တော့ ဦးရန်ဝေးရဲ့နှမဖြစ်သူ ဒေါ်နီဟာ ဦးရန်ဝေးထံလာပြီး အထောက်အပံ့တောင်းပါတယ်။ ဦးရန်ဝေးအနေဖြင့်လည်း ရသည့် လစာ ၂၀၀၀ တွင် ဝန်ကတော်အတွက် ၁၀၀၀၊ ငယ်သားများအတွက် ၅၀၀ ၊ သူ့အသုံးစရိတ်အတွက် ၅၀၀ သုံးစွဲပြီးဖြစ်သဖြင့် အပိုအလျှံ မရှိတာကြောင့် အခက်ကြုံရပါတယ်။ ဒီအချိန်မှာပဲ ရွှေပန်းတိမ် ဆီမှာ မင်းတုန်းမင်းရွှေပုခက်လုပ်ရာမှာ ပိုလာတဲ့ ရွှေ ၄၅ ကျပ်သား တစ်တုံး ကိုတွေ့တာကြောင့် ယူပြီး နှမဖြစ်သူကိုပေးလိုက်ပါတယ်။

ဒီအကြောင်းမင်းတုန်းမင်း ကြားတော့ ဟုတ်မဟုတ် ယောအတွင်းဝန် ဦးဘိုးလှိုင် ကို စေလွှတ်ကာ ဦးရန်ဝေးကို မေးစေရော ဦးရန်ဝေးက ” ငါယူတာမှန်တယ် ၊ ငါ့နှမဒုက္ခသည်ကိုထောက်ပံ့ရန်တာဝန်ရှိသည်။ တံစိုးလက်ဆောင်လည်း ငါမယူ။ ထို့ကြောင့် ခိုးချင်ခိုး ကိုယ့်ဘုရင် ပစ္စည်းသာခိုးသည်။ နောင်သံသာရာတွင် ဒီအပြစ်အတွက် အတုံ အလှည့်ခံရလည်း ကိုယ့်ဘုရင်အိမ်မှာ ခွေးဖြစ်ဖြစ် ခံရတာမြတ်တယ် လို့ အောက်မေ့ပြီး ငါယူခဲ့တယ် ” ဟု ဆိုပါတယ်။ ဒီစကားမင်းတုန်းမင်း ကြားတော့ အလွန်သဘောကျတော်မူပြီး ရွှေတုံးကို ၁၀၀၀ ဖြင့်ပြန် ရွေးစေကာ ၊ ဒေါ်နီကိုလည်း အနောက်ဆောင်မိဖုရားများမှစောင့်ရှောက်စေပါတယ်။

 

မင်းတုန်းမင်းကြီးဟာ ဘာသာတရားကို ကြည်ညိုလွန်းသူဖြစ်ပါတယ်။ ဒီအတွက်သာသနာရေးကိစ္စများ အသုံးပြုရန် အခွန်ကောက်ခံလိုကြောင်း ဦးရန်ဝေးအား တိုင်ပင်ပါတယ်။ ဒီအခါ ဦးရန်ဝေးဖြေလိုက်သည်ကား “မဟာသမ္မတမင်း လက်ထက်မှစကာ ရှေးမင်းအဆက်ဆက်တို့သည် ဆယ်ဖို့တစ်ဖို့ ၊ ဆယ်ခိုင်တစ်ခိုင်သာ ကောက်ယူသည့်ထုံးစံရှိကြောင်း ၊ မည်သည့်အကြောင်းကြောင့်မှ ပိုမိုကောင်ခံရန်မသင့်ကြောင်း ၊ ကောက်ယူမည်ဆိုလျှင် ရှေးအစဉ်အလာကို ဖောက်ဖျက်သည့်အတွက် ဥယျာဉ်ကို မျောက်ဖျက်သည် နှင့် တူကြောင်း ” လျှောက်တင်ရာ မင်းတုန်းမင်း လက်လျှော့ရပြန်ပါတယ်။

နောက်တစ်ကြိမ်က ကရင်နီနယ် အရေးပါ။ ဒီတစ်ကြိမ်တော့ မင်းတုန်းမင်းတော်တော်လေး ဒေါသထွက်သွားပုံပါပဲ။ ဖြစ်ပုံက ကရင်နီစော်ဘွားက သူ့နယ်ကိုလာသိမ်းဖို့ မင်းတုန်းမင်းအား စာပို့လျှောက်ထားပါတယ်။ မင်းတုန်းမင်းကလည်း သိမ်းယူမည်ဟု ဆိုကာ လွှတ်တော်အားအမိန့်ပြန်စေဖို့ စေခိုင်းလိုက်ပါတယ်။ ဦးရန်ဝေးက အမိန့်စာကို ဆုတ်ဖြဲ၍ “မင်းတို့မြင်တဲ့အတိုင်း လျှောက်တင်လိုက်” ဟုမင်းချင်းတို့အားပြောလိုက်ပါတယ်။ မင်းတုန်းမင်းလည်း အမျက်ကြီးစွာထွက်ကာ ဦးရန်ဝေးအား ဆင့်ခေါ်စေပါတယ်။ ဦးရန်ဝေးကလည်း ” တိုင်းရေးပြည်မှုတွေနဲ့ လွှတ်တော်မှာ အလုပ်ရှုပ်နေတယ် ။ အမိန့်နဲ့ ဆင့်ခေါ်တိုင်း မလာနိုင်ဘူး လျှောက်လိုက် ” ဟု ခပ်ပြတ်ပြတ် တုံ့ပြန်ပါတယ်။ တကယ့် ဦးရန်ဝေးပါပေ။

မင်းတုန်းမင်းမှာလည်း ဒေါသထွက်ပေမယ့် ဆရာလည်းဖြစ် အလွန်လေး စားသူလည်း ဖြစ်တာကြောင့် ဘာမှမပြောပဲ ကြည့်နေရပါတယ်။ ငါးရက်ကြာမှ အခစားဝင်ရာ မင်းတုန်းမင်းက အဘယ်ကြောင့် အမိန့်ကို ဖျက်သနည်းဟု မေးရာ “ကရင်နီသည် ယိုးဒယားနယ်စပ်ဖြစ်သည်။ ကိုယ့်ပိုင်နက်နယ်စပ်မှာ ရှိလာလျှင် ကုလားဖြူပိုင်နက်နှင့်လည်း နီးစပ်ကာ အယှက်အတင်အထွေးအရော ဖြစ်လာနိုင်သည်။ ကုလားဖြူတို့ ထကြွလာနိုင်သည်။ နှစ်စဉ် ဆက်သမြဲ လက်ဆောက်ပဏ္ဍာတော်ကို သာ အေးအေးဆေးဆေး ယူသည့်သည်။ အကျိုးထက် အပြစ်ပိုများမည်။ ပြီးတော့ မင်းမည်သည် မင်းနှင့်တူအောင် ကျင့်ရသည်။ သူတစ်ပါးပြောတိုင်း မလုပ်သင့်။ လွှတ်တော်ကိုမတိုင်ပင်ပဲ အမိန့်တွေထုတ်လိုလျှင် ဘာကြောင့်လွှတ်တော်ကို ထားဦးမည်နည်း။ ဖျက်သိမ်းလိုက်လျှင် ပိုကောင်းမည် ” ဟုရှင်းလင်း လျှောက်တင်ရာ အလုံးစုံမှန်နေသဖြင့် မင်းတုန်းမင်းမှာ ဆိုဖွယ်ရာမရှိ ၊ နားထောင်လို့သာ နေရပါတယ်။

နောက်တစ်ခုတွင်လည်း မင်းတုန်းမင်းက “ငါ့အမူထမ်းများ မယားများ စွာယူနေကြလို့ လစာရိက္ခာ မလောက်မငဖြစ်၊ တံစိုးလက်ဆောင်တွေ စားဖြစ်နေကြသည်။ ဒါကြောင့် ရာထူးအလိုက် မယားဦးရေကန့် သတ်လျှင်ကောင်းမည်” ဟုဆိုရာ ဦးရန်ဝေးကြားသော် “အေး၊ တိုင်းပြည်မှာ ဘုရင်ဟာ မယားအများဆုံးယူတဲ့ ပုဂ္ဂိုလ်ပဲ ၊ ဒီတော့ ဘုရင်ကိုပါ ထည့်သွင်းပညတ်မှ ဒီအမိန့်ဥပဒေဟာ တရားမျှတ မှန်ကန်မယ်” ဟု ဆိုရာ မင်းတုန်းမင်းဟာ သူ့အကြံကို လက်လျှော့ရပြန်ပါတယ်။ ဦးရန်ဝေးဟာ ဘုရားပွဲတစ်ခုသွားရင်း ဝန်ကတော်လေးတစ်ဦး က ခြောက်ထောင်စလှည်းယာဉ် နဲ့ ရွှေထီးဆောင်းလို့ အဆောင်ကိုင်များနဲ့ တခမ်းတနားသွားနေတာ မြင်ရတော့ သူ့လည်းသမားအား
” ဒီဝန်ကတော်ကို ကြိမ်လုံးနဲ့ရိုက်စမ်း” လို့စေခိုင်းလိုက်ပါရော။ ဝန် ကတော်ခဗျာမှာလည်း ကြောက်လန့်ပြီး အိမ်ပြန်ပြေးရပါတယ်။ ဒါကို မင်းတုန်းမင်းက ဘာကြောင့်ရိုက်သနည်းဟု မေးရာ “ဝန်ကတော်ဟာ သူ့လင်ရတဲ့လခထက် အဆပေါင်းများစွာ ပိုသုံးစွဲကာ တဆောင်တယောင် လုပ်တယ်။ ဒါကိုပြည်သူတွေကမြင်လျှင် ဝန်ကတော်ဟာ တံစိုးလက်ဆောင်ရလို့ ဒီလိုခမ်းခမ်းနားနား သွားနိုင်တာပဲလို့ ထင်ကြမယ်။ ဒါကြောင့် တော်မတော် မသိတဲ့ဘဝင်ကို ချနှိမ်ဖို့ ရိုက်ဆုံး မခိုင်းတာပါ ” လို့ လျှောက်တင်ပါတယ်။

 

နောက် လွှတ်တော်သို့ရောက်လာတဲ့ ရာထူးခန့်အပ်ရေးဆိုင်ရာ အမိန့်စာချွန်လွှာကို ဦးရန်ဝေးက ချိုးဖျက်ပြန်ပါတယ်။ အကြောင်းမှာ ထိုရာ ထူးများမှာ မိဖုရားငယ်တို့ အကြိုက် ၎င်းတို့၏ ဆွေမျိုးသားချင်းများကို ခန့်ထားစေရန်အတွက် ဖြစ်တာကြောင့်ပါ။ မင်းတုန်းမင်းမေးသော် ” လွှတ်တော်ဆိုတာ တိုင်းပြည်ကောင်းဖို့ ဘုရင့်အမိန့်တော်ကိုသာ နာခံပြီး အမှုတော်ထမ်းရွက်တာဖြစ်ပါတယ်။ မိဖုရားများအမိန့်ကိုတော့ နာခံဖို့မရှိပါ” ဟု ပြန်လည် လျှောက်တင်ပါတယ်။ ဦးရန်ဝေးကလည်း ဦးရန်ဝေး ၊ မင်းတုန်းမင်းကလည်း မင်းတုန်းမင်းပါပဲ ။ မင်းတုန်းမင်းနေရာမှာ အခြားမင်းတစ်ပါးသာဆိုရင် ဦးရန်ဝေး ဟာ စောစောစီးစီး အမျက်တော်သင့်နိုင်ပါတယ်။

ဦးရန်ဝေးဟာ မျက်နှာဖြူအရာရှိများရဲ့ လေးစားခြင်းကိုလည်း ခံရသူပါ။ အီးဘီစလေဒင်က “ဝန်ကြီးဟာ ပွင့်လင်းသူ ၊ တရားမျှတသူ ” လို့အကြိမ်ကြိမ်ဖော်ပြပါတယ်။ ‘ဖိုက်’ ရဲ့ မန္တလေးသွားမှတ်တမ်းမှာလည်း ‘ပခန်းမင်းကြီးဟာ အလွန်ဗဟုသုတ ကြွယ်ဝကြောင်း ၊ သံကြီး တမန်ကြီး လက္ခဏာများနဲ့ အပြည့်စုံဆုံး ပုဂ္ဂိုလ်ဖြစ်ကြောင်း ၊ အရေးကြီးပြသနာများကို ဖြေရှင်းနိုင် သူဖြစ်ကြောင်း ” ချီးကျူးရေးထားပါတယ်။ ‘ဝှီးလား’ ကလည်း “အသက်ခြောက်ဆယ်ခန့် ရှိပြီဖြစ်သော ပခန်းဝန်ကြီးသည် နဖူးကျယ်ကျယ်၊ ကျောက်ပေါက်မာ သက်သက် ၊ ကွမ်းစားထားသော သွားများက မည်းနက်လျက်ရှိပြီး သိက္ခာ သမာဓိနှင့် အပြည့်ရှိသော အသွင်ကိုဆောင်သည် ” ဟု မှတ်တမ်းတင်ခဲ့ပါတယ်။

ဘုရင်ကို ကျော်လွန်တတ်လို့ ပြည်သူများက ချစ်စနိုးနဲ့ ‘ပခန်းရှင်ဘုရင်ကြီး’ ဟုအခေါ်ခံရသူ ၊ မင်းတုန်းမင်းက ‘ဆရာကြီး’ ဟု ခေါ်လေ့ရှိသူ ဦးရန်ဝေးဟာ ၁၂၃၇ ခု ၊ တော်သလင်းလ အသက် ၆၃ နှစ်မှာ ကွယ်လွန်ခဲ့ပါတယ်။ ဦးရန်ဝေးကွယ်လွန်တော့ မင်းတုန်းမင်းကိုယ်တိုင် အိမ်တော်ကို ကြွလာပြီး မျက်ရည်စို့စို့နဲ့ ” ဆရာကြီးသည် တိုင်းရေး ပြည်မှုမှစ၍ ကျွန်ုပ်အကျိုးကို များစွာဆောင်ပါပေသည်။ ဆရာကြီးကျေးဇူး ကျွန်ုပ်အပေါ်မှာ ရှိပါပေသည်။ ဆရာကြီး၏ ကျေးဇူးကို ကျွန်ုပ်က ကြီးကျယ်သော ကျေးဇူးပြန်၍ မဆပ်နိုင်၊ မချီးမြှောက်နိုင် ကြွေးတင်လျက် ရှိခဲ့လေသည် ။ ဆရာကြီးကဲ့သို့ ကျွန်ုပ်အပေါ် စောင့်ရှောက်ဆုံးမမည့် မင်းကြီး ပေါ်ပေါက်လာမည် မထင်ပေ ” လို့ မြည်တမ်းရှာပါတယ်။ မင်းတုန်းမင်းရဲ့ စကားဟာ ဝမ်းနည်းကြေကွဲခြင်းမှာ မြစ်ဖျားခံပေမယ့် ပခန်းဝန်ကြီးရဲ့ သီလ၊ မသာဓိဂုဏ် နဲ့ သူကိုယ်တိုင် ဆိုဆုံးမလွယ် သူဖြစ်ကြောင်း ဖော်ပြတဲ့စကားတွေ ဖြစ်တယ်လို့ မှတ်တမ်းတင်ရင်း ဥပဒေအထက်မှာ မည်သူမျှမထားတဲ့ လေးစားဖွယ် ပခန်းမင်းကြီး ဦးရန်ဝေးအကြောင်းကို ဗဟုသုတအဖြစ် တင်ဆက်လိုက်ပါတယ်။

Ref:
သမိုင်းမတွင် သမိုင်းတွင် သမိုင်းဝန်နေတဲ့စကားများ – ချစ်ဦးညို

Credit:

2 Shares

Add a Comment

Your email address will not be published. Required fields are marked *